အားကစားနှင့်လူငယ်ရေးရာဝန်ကြီးဌာန၊ အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးဉာဏ်ဇော်ဦး AFC Women Club Champion League ပြိုင်ပွဲသို့ ဝင်ရောက်ယှဉ်ပြိုင်မည့် I.S.P.E FC အမျိုးသမီးဘောလုံးအသင်းနှင့် တွေ့ဆုံ
ရန်ကုန်၊ ဩဂုတ်လ(၁၅)ရက်။
AFC Women Club Champion League ပြိုင်ပွဲသို့ ဝင်ရောက်ယှဉ်ပြိုင်မည့် I.S.P.E FC အမျိုးသမီးဘောလုံးအသင်းနှင့်တွေ့ဆုံပွဲအခမ်းအနားကို ယနေ့နံနက် (၁၀ : ၃၀) နာရီအချိန် တွင် ရန်ကုန်မြို့ကျိုက္ကဆံဝင်းအတွင်းရှိ အားကစားနှင့်ကာယပညာသိပ္ပံ (ရန်ကုန်) အစည်းအဝေးခန်းမ၌ ကျင်းပခဲ့ရာ အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးဉာဏ်ဇော်ဦး၊ ဒုတိယညွှန်ကြားရေးမှူးချုပ် ဦးကျော်ဦး၊ အားကစားနှင့်ကာယပညာသိပ္ပံ(ရန်ကုန်) ကျောင်းအုပ်ကြီး ညွှန်ကြားရေးမှူး ဦးထွန်းထွန်းဦး၊ ရန်ကုန်တိုင်းဒေသကြီး အားကစားနှင့်ကာယပညာဦးစီးဌာန ညွှန်ကြားရေးမှူး ဦးကျော်မင်းသန်း၊ I.S.P.E FC အမျိုးသမီးဘောလုံးအသင်းမှ အုပ်ချုပ်/နည်းပြများ၊ ဆေးအဖွဲ့မှ တာဝန်ရှိသူများနှင့် အားကစားသမားများ တက်ရောက်ခဲ့ကြသည်။
ဦးစွာ I.S.P.E FC အမျိုးသမီးဘောလုံးအသင်းမှ အုပ်ချုပ်/နည်းပြများ၊ ဆေးအဖွဲ့မှ တာဝန်ရှိသူများနှင့်အားကစားသမားများက တစ်ဦးချင်းမိတ်ဆက်ကြပြီး အသင်းအုပ်ချုပ်သူနှင့် နည်းပြတို့က AFC Women Club Champion League ပြိုင်ပွဲသို့ ဝင်ရောက်ယှဉ်ပြိုင်ရာတွင် အောင်နိုင်မှုရရှိရေးအတွက် ကြိုတင်ပြင်ဆင် ဆောင်ရွက်ထားရှိမှု အခြေအနေများ၊ ပြိုင်ပွဲလေ့ကျင့် ရေးဘောလုံးကွင်းရရှိရေးအတွက် မြန်မာနိုင်ငံဘောလုံးအဖွဲ့ချုပ်ဖြင့် ညှိနှိုင်း ဆောင်ရွက်ထားရှိမှု အခြေအနေများ၊ Training လေ့ကျင့်မှုပုံစံများနှင့် Training လေ့ကျင့်ကစားရာ၌ ရရှိသည့် ရလဒ် အခြေအနေများ ၊ ပြိုင်ဘက်အသင်းများ၏ အခြေအနေအပေါ် လေ့လာသုံးသပ်ချက်များ၊ နည်းပြ များ၏ သင်ကြားညွှန်ပြမှုများ၊ ကစားသမားများ၏ စိတ်နေစိတ်ထားနှင့် စွမ်းဆောင်နိုင်မှုများ ၊ ပြိုင်ပွဲသုံးအထောက်အကူပြုပစ္စည်းများ၊ ဝယ်ယူရရှိနိုင်ရေးများကိုလည်းကောင်း၊ ဆေးအဖွဲ့မှ တာဝန်ရှိသူတို့က လိုအပ်သည့်ဆေးဝါးများရရှိရေး၊ အားကစားသမားများ၏ ကျန်းမာရေးအခြေ အနေနှင့် ကုသပေးနေမှုအခြေအနေများအား တင်ပြဆွေးနွေးခဲ့ပါသည်။
ဆက်လက်၍ I.S.P.E FC ဘောလုံးအသင်း၏ CEO ၊ အားကစားနှင့်ကာယပညာဦးစီးဌာန ဒုတိယညွှန်ကြားရေးမှူးချုပ် ဦးကျော်ဦး က ပြိုင်ပွဲနှင့်ပတ်သက်သည့် လိုအပ်ချက်များ၊ အသင်း လူရွေးချယ်ရာတွင် မှန်မှန်ကန်ကန် ဆောင်ရွက်ရန်၊ စည်းလုံးညီညွတ်မှုရှိရန်၊ ကျန်းမာရေးကို အထူး ဂရုစိုက်ရန်၊ အောင်နိုင်စိတ်ကိုအရင်းခံပြီး စိတ်ဓာတ်၊စည်းကမ်းကောင်းစွာဖြင့် I.S.P.E FC မြန်မာအမျိုးသမီးဘောလုံးအသင်းအနိုင်ရရှိအောင် ကြိုးစားကြရန် မှာကြားခဲ့သည်။
ထို့နောက် အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးဉာဏ်ဇော်ဦး က နိဂုံးချုပ်အမှာစကားပြောကြားရာတွင် နိုင်ငံကိုယ်စားပြု ယှဉ်ပြိုင်ကစားကြမည့် အားကစားသမား များအား လေးစားဂုဏ်ယူပါကြောင်း၊ ဂူအမ် ၊ မွန်ဂိုလီးယား ၊ ဖိလစ်ပိုင် အသင်းတို့နှင့် ယှဉ်ပြိုင် ကစားရာတွင် အောင်မြင်မှုရရှိအောင်ကြိုးစားကြရန် ၊ တစ်ဖက်ယှဉ်ပြိုင်မည့်အသင်း၏ အားနည်းချက် / အားသာချက်များကိုသိရှိပြီး ယှဉ်ပြိုင်အနိုင်ယူနိုင်အောင် ကြိုးစားကစားကြရန် အခက်အခဲရှိပါက ချက်ခြင်းတင်ပြစေပြီး လိုအပ်ချက်များကို ဖြည့်ဆည်းဆောင်ရွက်ပေးမည်ဖြစ်ကြောင်း၊ မိမိအသင်း အောင်မြင်မှုရရှိပြီးအမိမြန်မာနိုင်ငံ၏ဂုဏ်ကို မြှင့်တင်နိုင်သူများ ဖြစ်အောင်ကြိုးစားကြရန် မှာကြား ခဲ့ကြောင်းသိရှိရသည်။
