အားကစားနှင့်လူငယ်ရေးရာဝန်ကြီးဌာန၊ အားကစားနှင့်ကာယပညာဦးစီးဌာန၊ အခြေခံပညာဦးစီးဌာနနှင့် မြန်မာနိုင်ငံဘတ်စကက်ဘောအဖွဲ့ချုပ်တို့ ပူးပေါင်းဖွင့်လှစ်သော ဘတ်စကက်ဘောဒိုင်လူကြီးသင်တန်းဖွင့်ပွဲကျင်းပ
ရန်ကုန်၊ ဇွန်လ(၅)ရက်။
အားကစားနှင့် လူငယ်ရေးရာဝန်ကြီးဌာန၊ အားကစားနှင့် ကာယပညာဦးစီးဌာန၊ အခြေခံပညာဦးစီးဌာနနှင့် မြန်မာနိုင်ငံဘတ်စကက်ဘောအဖွဲ့ချုပ်တို့ ပူးပေါင်းဖွင့်လှစ်သော ဘတ်စကက်ဘောဒိုင်လူကြီးသင်တန်းဖွင့်ပွဲအခမ်းအနားကို ယနေ့ နံနက်(၉) နာရီအချိန်က ရန်ကုန်မြို့၊ ဗဟန်းမြို့နယ် အနောက်မျဉ်းပြိုင်ကွင်းလမ်းရှိ ကျိုက္ကဆံဘတ်စကက်ဘော အားကစားရုံ၌ ကျင်းပရာ မြန်မာနိုင်ငံ ဘတ်စကက်ဘောအဖွဲ့ချုပ် ဒုတိယဥက္ကဌ ဦးမောင်မောင်မြင့်နှင့်အမှုဆောင်များ၊ ဒိုင်လူကြီး နည်းပြ ဆရာ/ ဆရာမများ၊သင်တန်းသား/ သင်တန်းသူများ တက်ရောက်ကြသည်။
ဦးစွာ တိုင်းဒေသကြီးနှင့်ပြည်နယ်အခြေခံပညာ ဦးစီးဌာနအသီးသီးမှ ကာယ ဆရာ/ ဆရာမများ တစ်ဦးချင်းက မိတ်ဆက်ပေးခဲ့ကြပြီး မြန်မာနိုင်ငံ ဘတ်စကက်ဘောအဖွဲ့ချုပ် ဥက္ကဌ(ကိုယ်စား) ဒုတိယဥက္ကဌ ဦးမောင်မောင်မြင့်က အဖွင့်အမှာစကားပြောကြား၍ အမှုဆောင် များ၊ သင်တန်းသား/သင်တန်းသူများနှင့်အတူ အမှတ်တရ စုပေါင်းမှတ်တမ်းတင် ဓာတ်ပုံရိုက်ခဲ့ ကြသည်။
သင်တန်းကို ၂၀၂၄ ခုနှစ် ၊ ဇွန်လ(၃)ရက်မှ (၁၂)ရက်နေ့အထိ ဖွင့်လှစ်သင်ကြား သွားမည်ဖြစ်ရာ အဆိုပါသင်တန်းသို့ တိုင်းဒေသကြီးနှင့်ပြည်နယ်အခြေခံပညာဦးစီးဌာန အသီးသီးမှ သင်တန်းသား(၁၆)ဦး ၊ သင်တန်းသူ(၂၀)ဦး စုစုပေါင်း(၃၆)ဦး တက်ရောက်ခဲ့ကြောင်း သိရှိရသည်။
