မြစ်ကြီးနားမြို့၌ လူငယ်ရေးရာ အသိပညာပေးဟောပြောပွဲ ကျင်းပပြုလုပ်
မြစ်ကြီးနား၊ ဇူလိုင် ၁၆
ကချင်ပြည်နယ် လူငယ်ရေးရာဦးစီးဌာနမှ လူငယ်ရေးရာအသိပညာပေးဟောပြောပွဲကို ဇူလိုင် ၁၅ ရက်နေ့က မြစ်ကြီးနားမြို့ ပညာရေးဒီဂရီကောလိပ်ရှိ အားကစားခန်းမ၌ ကျင်းပပြုလုပ်ခဲ့သည်။
ယင်းအခမ်းအနားသို့ ကချင်ပြည်နယ်ဝန်ကြီးချုပ် ဦးခက်ထိန်နန်၊ အားကစားနှင့်လူငယ်ရေးရာဝန်ကြီးဌာန ဒုတိယဝန်ကြီး ဦးဇင်မင်းထက်၊ ပြည်နယ်တရားလွတ်တော် တရားသူကြီးချုပ်၊ ပြည်နယ်အစိုးရအဖွဲ့၀င် ၀န်ကြီးများ၊ ဌာနဆိုင်ရာများမှ တာ၀န်ရှိသူများ၊ ဆရာ/ဆရာမများနှင့် သင်တန်းသူ/သားများ စုစုပေါင်း ၆၀၀ ဦးခန့် တက်ရောက်ခဲ့သည်။
အခမ်းအနားတွင် ပြည်နယ်ဝန်ကြီးချုပ်ဦးခက်ထိန်နန်မှ “လူငယ်တွေဟာ အနာဂတ်ရဲ့ နိုင်ငံ့ခေါင်းဆောင်၊ နည်းပညာတီထွင်ဖန်တီးသူ၊ ငြိမ်းချမ်းရေးဖော်ဆောင်သူ စသဖြင့် နိုင်ငံတော်ဖွံ့ဖြိုးတိုးတက်ရေးမှာ အရေးပါတဲ့ လူ့စွမ်းအားအရင်းအမြစ်တွေဖြစ်ကြတာကြောင့် နယ်ပယ်ကဏ္ဍအသီးသီးမှာရှိတဲ့ လူငယ်များ ဆောင်ရွက်နိုင်တဲ့အခွင့်အလမ်းများကို ဖန်တီးပေးနိုင်ဖို့ ကချင်ပြည်နယ်လူငယ်ရေးရာကော်မတီဝင်များအနေနဲ့ ပူးပေါင်းကြိုးပမ်းဆောင်ရွက်ပေးလျက်ရှိကြောင်း” ပြောကြားသည်။
ပြည်နယ်အစိုးရအဖွဲ့၏ လမ်းညွှန်ချက်နှင့်အညီ ပြည်နယ်လူငယ်ရေးရာကော်မတီအနေဖြင့် ပြည်နယ်အတွင်းရှိ လူငယ်များ၏ အနာဂတ်ကို အားကစားဖြင့်ပိုမိုကောင်းမွန်အောင်ဆောင်ရွက်ပေးနိုင်ရေးအတွက် မူးယစ်ကင်းစင် ကချင်ပြည်နယ်တခွင် အားကစားလှုပ်ရှားမှုများအနေဖြင့် ပြိုင်ပွဲများစဉ်ဆက်မပြတ်ကျင်းပပြုလုပ်ပေးခြင်း၊ သင်တန်းများ ဖွင့်လှစ်ပေးခြင်း၊ လူငယ်နှင့် အားကစားကဏ္ဍဆိုင်ရာ အသိပညာပေးဟောပြောပွဲများ၊ ပြိုင်ပွဲများကိုလည်း ကျင်းပပြုလုပ်ပေးလျက်ရှိကြောင်း သိရသည်။
အားကစားနှင့်လူငယ်ရေးရာဝန်ကြီးဌာန၊ ဒုတိယဝန်ကြီး ဦးဇင်မင်းထက်မှ “ နိုင်ငံ့လူဦးရေရဲ့ ၃၄ ရာခိုင်နှုန်းနီးပါးဟာ အသက် ၁၅ နှစ်မှ ၃၅ နှစ်အတွင်းရှိတဲ့ လူငယ်များဖြစ်ပါတယ်။ ဒါဟာ ပြည်လူထုရဲ့သုံးပုံတစ်ပုံရှိနေပြီး လူငယ်ရေးရာမူဝါဒတွေကို ရေးဆွဲပြဋ္ဌာန်းပြီး လက်တွေ့ အကောင်အထည် ဖော်ဆောင်ရွက်နိုင်ရေးအတွက် မဟာဗျူဟာစီမံချက် ၂၀၂၅-၂၀၂၉ ကိုလည်း ရေးဆွဲပြဋ္ဌာန်းထားပြီးဖြစ်ပါတယ်။ လူငယ်တွေရဲ့ ဘက်စုံဖွံ့ဖြိုးတိုးတက်လာစေရေးနဲ့ ပိုမိုကောင်းမွန်တဲ့ အနာဂတ်လူ့အဖွဲ့အစည်းကို တည်ဆောက်သွားဖို့က အလွန်အရေးကြီးပါကြောင်း” ပြောကြားခဲ့သည်။
ဆက်လက်၍ မြန်မာစာဌာနဌာနမှူးအား အမှတ်တရလက်ဆောင်ချီးမြှင့်ခြင်း၊ ပညာရေးဒီဂရီကောလိပ်(မြစ်ကြီးနား)အား အားကစားပစ္စည်းများထောက်ပံ့ပေးအပ်ခြင်း၊ ဘင်ခရာအဖွဲ့များနှင့် ဖျော်ဖြေရေးအဖွဲ့များအား ဂုဏ်ပြုချီးမြှင့်ငွေများ အသီးသီးပေးအပ်ခဲ့ကြပါသည်။
