နီပေါလေးနိုင်ငံဖိတ်ခေါ်ဖလားပြိုင်ပွဲတွင် ချန်ပီယံဆုဖလားရရှိခဲ့သော မြန်မာအမျိုးသမီး လက်ရွေးစင်အသင်းအား ဂုဏ်ပြုအခမ်းအနားကျင်းပ

နီပေါလေးနိုင်ငံဖိတ်ခေါ်ဖလားပြိုင်ပွဲတွင် ချန်ပီယံဆုဖလားရရှိခဲ့သော မြန်မာအမျိုးသမီး လက်ရွေးစင်အသင်းအား ဂုဏ်ပြုအခမ်းအနားကျင်းပ

ရန်ကုန်၊ မတ်လ(၉)ရက်

ဖေဖော်ဝါရီ ၁၇ ရက်မှ ၂၆ ရက်အထိ နီပေါနိုင်ငံ၌ကျင်းပသည့် International Women’s Championship 2025 လေးနိုင်ငံအမျိုးသမီးဘောလုံးဖိတ်ခေါ်ပြိုင်ပွဲတွင် ချန်ပီယံဆုရခဲ့သည့် မြန်မာ့လက်ရွေးစင် အမျိုးသမီးဘောလုံးအသင်းအား ဂုဏ်ပြုပွဲအခမ်းအနားကို မတ်လ ၉ ရက် မွန်းလွဲ ၃ နာရီခွဲက Novotel Yangon Max ဟိုတယ်၌ ပြုလုပ်ရာ အားကစားနှင့်လူငယ်ရေးရာဝန်ကြီးဌာန ပြည်ထောင်စုဝန်ကြီး Jeng Phang နော်တောင်၊ ရန်ကုန်တိုင်းဒေသကြီး အစိုးရအဖွဲ့ဝန်ကြီးချုပ် ဦးစိုးသိန်းနှင့် အစိုးရအဖွဲ့ဝင်ဝန်ကြီးများ၊ မြန်မာနိုင်ငံဘောလုံးအဖွဲ့ချုပ် ဥက္ကဋ္ဌ ဦးဇော်ဇော်နှင့် ဒုတိယဥက္ကဋ္ဌများ၊ အဖွဲ့ချုပ်အမှုဆောင်များ၊ ကလပ်အသင်းပိုင်ရှင်များ၊ အလှူရှင်များနှင့် ဖိတ်ကြားထားသူများ တက်ရောက်ကြသည်။

ဂုဏ်ပြုပွဲတွင် မြန်မာ့လက်ရွေးစင် အမျိုးသမီးအသင်း၏ ပြိုင်ပွဲတစ်လျှောက် ယှဉ်ပြိုင်ခဲ့မှု ရုပ်သံမှတ်တမ်းအား ကြည့်ရှုအားပေးကြပြီးနောက် အားကစားနှင့်လူငယ်ရေးရာဝန်ကြီးဌာန ပြည်ထောင်စုဝန်ကြီး Jeng Phang နော်တောင်က ဂုဏ်ပြုအမှာစကားပြောကြားခဲ့သည်။ ဆက်လက်၍ အောင်ပွဲရ မြန်မာ့လက်ရွေးစင် အမျိုးသမီးဘောလုံးအသင်းအတွက် အားကစားနှင့်လူငယ်ရေးရာ ဝန်ကြီးဌာနက ကျပ်သိန်း(၃၀၀)၊ ရန်ကုန်တိုင်းဒေသကြီးအစိုးရအဖွဲ့က ကျပ်သိန်း(၇၀၀)၊ KBZ Bank က ကျပ်သိန်း (၁၀၀၀)၊ AYA Bank က ကျပ်သိန်း(၁၀၀၀)၊ Max Energy ကကျပ်သိန်း(၆၀၀)၊ မြန်မာနိုင်ငံဘောလုံးအဖွဲ့ချုပ် အကြီးတန်းဒုတိယဥက္ကဋ္ဌ ဦးပြည့်ဖြိုးတေဇက ကျပ်သိန်း(၄၀၀)၊ A Bank က ကျပ်သိန်း(၃၀၀)၊ ATOM က ကျပ်သိန်း(၃၀၀)၊ BYD Essential Motors က ကျပ်သိန်း(၃၀၀)၊ Max Cement က ကျပ်သိန်း(၂၀၀)၊ MFF အမျိုးသမီးဘောလုံးကော်မတီ ဥက္ကဋ္ဌ ဒေါ်ခင်စံပယ်ကြည် က ကျပ်သိန်း(၂၀၀)၊ MNL လိဂ်ကော်မတီ ဥက္ကဌ ဦးဇော်မင်းသိန်း က ကျပ်သိန်း(၁၀၀)၊ MFF ဖူဆယ်နှင့် သဲသောင်ပြင်‌ဘောလုံးကော်မတီ ဥက္ကဋ္ဌ ဦးဝင်းသော် က ကျပ်သိန်း(၁၀၀)၊ ရှမ်းယူနိုက်တက်အသင်း ဥက္ကဋ္ဌ ဦးခွန်နောင်မြင့်ဝေ က ကျပ်သိန်း(၁၀၀)၊ ဦးထွန်းထွန်းလင်း (Poe Poe Trading)က ကျပ်သိန်း (၁၀၀)အား ပေးအပ်လှူဒါန်းခဲ့ကြရာ ပြည်ထောင်စုဝန်ကြီး၊ တိုင်းဒေသကြီးဝန်ကြီးချုပ်တို့က လက်ခံရယူခဲ့ပြီးနောက် ဂုဏ်ပြုဆုငွေစုစုပေါင်း ကျပ်သိန်း ၅၇၃၀ ကို မြန်မာ့လက်ရွေးစင် အမျိုးသမီးအသင်း အုပ်ချုပ်/နည်းပြ၊ ကစားသမားများထံသို့ ချီးမြှင့်ပေးအပ်ခဲ့ကြသည်။

အစီအစဉ်အရ မြန်မာ့လက်ရွေးစင် အမျိုးသမီးအသင်း ကိုယ်စား တိုက်စစ်မှူး ဝင်းသိင်္ဂီထွန်းနှင့် မေထက်လူတို့က ကျေးဇူးတင်စကားပြောကြားပြီး တက်ရောက်လာသူများနှင့် အမှတ်တရစုပေါင်း ဓာတ်ပုံရိုက်ကူးကြသည်။

မြန်မာ့လက်ရွေးစင် အမျိုးသမီးအသင်းသည် အဆိုပါ ပြိုင်ပွဲတွင် နီပေါ၊ ကာဂျစ္စတန်၊ လက်ဘနွန်အသင်းတို့နှင့် လေးသင်းပတ်လည်ယှဉ်ပြိုင်ကစားခဲ့ပြီး အုပ်စုပွဲများတွင် လက်ဘနွန် အသင်းကို သုံးဂိုး-တစ်ဂိုး၊ ကာဂျစ္စတန်အသင်းကို ငါးဂိုးပြတ်အနိုင်ရကာ အိမ်ရှင်နီပေါအသင်းနှင့် နှစ်ဂိုးစီသရေကျကာ အုပ်စုပထမဖြင့် ဗိုလ်လုပွဲတက်ရောက်နိုင်ခဲ့သည်။ ဗိုလ်လုပွဲတွင် အိမ်ရှင်နီပေါ အသင်းကို နှစ်ဂိုး-ဂိုးမရှိဖြင့် အနိုင်ယူပြီး ချန်ပီယံဆု ထိုက်ထိုက်တန်တန် ရယူနိုင်ခဲ့ကြောင်း သိရှိရသည်။