မြန်မာနိုင်ငံကင်းထောက်လူငယ်သင်တန်း ဖွင့်ပွဲအခမ်းအနားကျင်းပ
နေပြည်တော်၊ မတ် ၂၄
မြန်မာနိုင်ငံလူငယ်ရေးရာဗဟိုကော်မတီနှင့် နေပြည်တော်ကောင်စီနယ်မြေ လူငယ်ရေးရာကော်မတီတို့ ပူးပေါင်းဖွင့်လှစ်သည့် ၂၀၂၆ ခုနှစ်၊ မြန်မာနိုင်ငံကင်းထောက်လူငယ်သင်တန်း ဖွင့်ပွဲအခမ်းအနားကို ယနေ့နံနက်ပိုင်းတွင် နေပြည်တော်၊ ဇမ္ဗူသီရိမြို့နယ် အ.ထ.က(၁၁)၌ ကျင်းပခဲ့သည်။
ဦးစွာ အ.ထ.က (၁၁)ကျောင်းမှ ကျောင်းသား/ကျောင်းသူလူငယ်လေးများက မြန်မာနိုင်ငံကင်းထောက်လူငယ်သီချင်းဖြင့် သီဆိုဖျော်ဖြေခဲ့ကြပြီးနောက် အားကစားနှင့်လူငယ်ရေးရာဝန်ကြီးဌာန ဒုတိယဝန်ကြီး ဦးထိန်လင်းက အဖွင့်အမှာစကားပြောကြားရာတွင် မြန်မာနိုင်ငံလူငယ်ရေးရာ ဗဟိုကော်မတီအနေဖြင့် နိုင်ငံတော်၏ အနာဂတ်အတွက် လူငယ်များကို အရေးပါသည့် အရင်းအမြစ်များအဖြစ် သတ်မှတ်ပြီး လူငယ်များ၏ စွမ်းဆောင်ရည်ဖွံ့ဖြိုးတိုးတက်ရေးအတွက် လူငယ်မူဝါဒ အဓိကကဏ္ဍ(၁၆)ရပ်အား ထိရောက်စွာ ကြိုးပမ်းအကောင်အထည်ဖော်ဆောင်ရွက်လျက်ရှိကြောင်း၊ နိုင်ငံတော်အကြီးအကဲ၏ လမ်းညွှန်ချက်နှင့်အညီ ကျောင်းသား/ကျောင်းသူများအနေဖြင့် နွေရာသီကျောင်းပိတ်ရက်တွင် အားလပ်ချိန်များကို တန်ဖိုးရှိစွာ အသုံးချနိုင်ရန်အတွက် ကင်းထောက်သင်တန်းများအပါအဝင် လူငယ်များအကျိုးရှိစေမည့် နွေရာသီအားကစားလေ့ကျင့်ရေး သင်တန်းများအပြင် ကဏ္ဍစုံလှုပ်ရှားမှုများကို တိုင်းဒေသကြီးနှင့်ပြည်နယ် အသီးသီးတို့တွင်လည်း ဆောင်ရွက်ပေးလျက်ရှိကြောင်း၊ ကင်းထောက်လူငယ်သင်တန်းသည် လူငယ်များအနေဖြင့် တာဝန်သိသည့် နိုင်ငံသားကောင်းများဖြစ်လာစေရန်အတွက် ပုံသွင်းဖန်တီးသည့်နေရာဖြစ်ကြောင်း၊ လူငယ်လူရွယ်များ၏ ကိုယ်ကျင့်တရားနှင့် အကျင့်စာရိတ္တများ ကောင်းမွန် လာအောင် ပြုပြင်ပေးပြီး စိန်ခေါ်မှုများကို ရဲရဲဝံ့ဝံ့ကျော်လွှားရဲသည့် လူငယ်များ၊ နိုင်ငံတော်က အားထားရသည့် လူငယ်များအဖြစ် လူမှုအဖွဲ့အစည်းများတွင် ပူးပေါင်းဆောင်ရွက်တတ်စေရန်၊ သွန်သင်ဆုံးမမှုများကို ရိုသေစွာလိုက်နာတတ်သည့် အလေ့အထများရရှိစေရန်နှင့် အခက်အခဲများကို ရင်ဆိုင်ဖြေရှင်းတတ်သည့် အလေ့အထကောင်းများ၊ သူတစ်ပါးကိုဖေးမကူညီလိုသည့် စိတ်ကောင်းစိတ်မြတ်များနှင့် လောကကောင်းကျိုး၊ နိုင်ငံ့အကျိုး၊ အများကောင်းကျိုးများကို စွမ်းစွမ်းတမံ ဆောင်ရွက်နိုင်မည့် လူကောင်းလူတော်များ၊ လူရည်ချွန်များ အများအပြား ပေါ်ထွက်လာစေရန် ရည်ရွယ်ပြီး ယခုသင်တန်းအား ဖွင့်လှစ်ပေးရ ခြင်းဖြစ်ပါကြောင်း၊ ကင်းထောက်ကို ရှေးယခင်က “ရန်သူအခြေအနေကို ကြိုတင်သိရှိဖို့အတွက် စုံစမ်းထောက်လှမ်းသည်”ဟု အနက်အဓိပ္ပာယ် ဖွင့်ဆိုခဲ့ကြောင်း၊ ကင်းထောက် ကတိ(၃)ပါးနှင့် ကင်းထောက် ကျင့်ဝတ်(၁၀)ပါးတို့ကို လိုက်နာထိန်းသိမ်းသွားကြရမည်ဖြစ်ကြောင်း၊ လူမှုဘဝအတွက် အထောက်အကူများစွာ ရရှိစေနိုင်မည်ဖြစ်ကြောင်း၊ သင်တန်းတက်ရောက် နေစဉ်ကာလအတွင်း စိတ်ပါဝင်စားစွာဖြင့် လေ့လာသင်ယူသွားကြရန်နှင့် နိုင်ငံ့အကျိုး၊ အများပြည်သူအကျိုးကို တတ်စွမ်းသမျှ သယ်ပိုးဆောင်ရွက်နိုင်ပြီး ဖွံ့ဖြိုးတိုးတက်သည့် လူ့ဘောင်အဖွဲ့အစည်းကို ဖန်တီးပုံဖော်ရာတွင် အားကြိုးမာန်တက် ပါဝင်ဆောင်ရွက်နိုင်မည့် ဗလငါးတန်နှင့်ပြည့်စုံသည့် ကင်းထောက်လူငယ် မောင်မယ်များဖြစ်အောင် ဆက်လက်ကြိုးစားသွားကြရန် တိုက်တွန်းပြောကြားခဲ့သည်။
ထို့နောက် နေပြည်တော်ကောင်စီဝင် ဗိုလ်မှူးကြီးရဲမိုးက အမှာစကားပြောကြားခဲ့ပြီး ၂၀၂၆ ခုနှစ်၊ နေပြည်တော်ကောင်စီနယ်မြေ ကင်းထောက်လူငယ်သင်တန်းအတွက် ရဲမာန်ဆောက်လုပ်ရေးကုမ္ပဏီ၊ Wisdom Hill Private School နှင့် Guardian Private School တို့က လှူဒါန်းငွေကျပ် (၁၀)သိန်းစီ ပေးအပ်လှူဒါန်းခဲ့ရာ ဒုတိယဝန်ကြီး ဦးထိန်လင်းက တာဝန်ရှိသူများအား ဂုဏ်ပြုမှတ်တမ်းလွှာများကို ပြန်လည်ပေးအပ်ခဲ့ပြီးနောက် အခမ်းအနားအား ရုပ်သိမ်းခဲ့ကြောင်း သိရသည်။
