ပြည်ထောင်စုဝန်ကြီး Jeng Phang နော်တောင် ရန်ကုန်မြို့ရှိ စခန်းဝင်လေ့ကျင့်နေသော အားကစားအဖွဲ့များနှင့် I.S.P.E FC အမျိုးသမီးဘောလုံးအသင်းတို့အား လိုက်လံကြည့်ရှုစစ်ဆေး

ပြည်ထောင်စုဝန်ကြီး Jeng Phang နော်တောင် ရန်ကုန်မြို့ရှိ စခန်းဝင်လေ့ကျင့်နေသော အားကစားအဖွဲ့များနှင့် I.S.P.E FC အမျိုးသမီးဘောလုံးအသင်းတို့အား လိုက်လံကြည့်ရှုစစ်ဆေး

ရန်ကုန်၊ ဩဂုတ်လ ၂၇ ရက်

မြန်မာနိုင်ငံအိုလံပစ်ကော်မတီ ဥက္ကဋ္ဌ၊ အားကစားနှင့်လူငယ်ရေးရာဝန်ကြီးဌာနနှင့် ဟိုတယ်နှင့်ခရီးသွားလာရေးဝန်ကြီးဌာန ပြည်ထောင်စုဝန်ကြီး Jeng Phang နော်တောင်သည် အားကစားနှင့်ကာယပညာဦးစီးဌာန ညွှန်ကြားရေးမှူးချုပ်ဦးဉာဏ်ဇော်ဦးနှင့် တာဝန်ရှိသူများ လိုက်ပါလျက် ယနေ့နံနက်ပိုင်းတွင် ရန်ကုန်တိုင်းဒေသကြီး၊ သင်္ဃန်းကျွန်းမြို့နယ်၊ လူငယ်အားကစားလေ့ကျင့်ရေးစခန်း သုဝဏ္ဏရှိ ပိုက်ကျော်ခြင်းအားကစားရုံသို့ရောက်ရှိရာ မြန်မာနိုင်ငံ Kabaddi အဖွဲ့ချုပ် ဒုတိယဥက္ကဋ္ဌနှင့်တာဝန်ရှိသူတို့က ကြိုဆိုကြပြီး (၃၃)ကြိမ်မြောက်အရှေ့တောင်အာရှအားကစားပြိုင်ပွဲသို့ ဝင်ရောက်ယှဉ်ပြိုင်ရန်အတွက် စခန်းသွင်းလေ့ကျင့်နေသာ ပဏာမလက်ရွေးစင် Kabaddi အားကစားသမားများလေ့ကျင့်နေမှုအား ကြည့်ရှုစစ်ဆေးပြီး ပြိုင်ပွဲသို့ စနစ်တကျပါဝင်ယှဉ်ပြိုင်နိုင်ရန် ခန္ဓာကိုယ်ကြံ့ခိုင်သန်မာမှု ရှိစေရန် ၊ ယုံကြည်မှုစိတ်ဓာတ်အပြည့်ဖြင့် ကြိုးစားကစားကြရန်မှာကြားပြီးနောက် အဖွဲ့ချုပ် ဒုတိယဥက္ကဋ္ဌနှင့် တာဝန်ရှိသူတို့မှ တင်ပြချက်များအပေါ် ပြည်ထောင်စုဝန်ကြီးမှ လိုအပ်ချက်များကို ဖြည့်ဆည်း ဆောင်ရွက်ပေးခဲ့သည်။

ဆက်လက်၍ ပြည်ထောင်စုဝန်ကြီးနှင့်အဖွဲ့သည် Sports Hotel ၌ AFC Women’s Championship League ပြိုင်ပွဲသို့ ဝင်ရောက်ယှဉ်ပြိုင်နေသည့် I.S.P.E FC အမျိုးသမီးဘောလုံး အသင်းနှင့်တွေ့ဆုံရာ အားကစားသမားများမှ တစ်ဦးချင်းမိတ်ဆက်ပြီး ပြည်ထောင်စုဝန်ကြီးက အားကစားသမားများအား ပြိုင်ပွဲယှဉ်ပြိုင်ကစားရာတွင် လက်ဝယ်ဖန်တီးနိုင်ခွင့်ရှိချိန်၌ အကောင်းဆုံး ကြိုးစားကြရန်၊ မြန်မာအသင်းစိတ်ဓာတ်အပြည့်ဖြင့် အောင်နိုင်ရေးကို အဓိကထားရန်၊ အခြေခံကောင်း ပြီး သိပ္ပံနည်းကျစနစ်တကျကစားတတ်ရန်၊ မိမိ၏အားကိုမလိုအပ်သည့်နေရာတွင်အသုံးမပြုဘဲ ချွေတာကစားတတ်ရန်၊ ကျန်းမာရေးကိုဂရုစိုက်ကြရန်၊ ပြိုင်ပွဲများတွင် အောင်မြင်မှုများရရှိခဲ့ပြီး (၃၃)ကြိမ်မြောက်အရှေ့တောင်အာရှအားကစားပြိုင်ပွဲ တွင်လည်း ဆက်လက်၍ အောင်မြင်မှုများရရှိ အောင်ကြိုးစားကြရန်မှာကြားပြီး အားကစားသမားများနေ့လယ်စာ စားသုံးနေမှုအားရင်းရင်းနှီးနှီး လိုက်လံကြည့်ရှုအားပေးခဲ့ပါသည်။

ယင်းနောက် ပြည်ထောင်စုဝန်ကြီးနှင့်အဖွဲ့သည် အမျိုးသားအားကစားပြိုင်ပွဲရုံ(၁)သုဝဏ္ဏရှိ မြန်မာနိုင်ငံဘိလိယက်နှင့်စနူကာလေ့ကျင့်ရေးခန်းမသို့ရောက်ရှိရာ မြန်မာနိုင်ငံဘိလိယက် နှင့်စနူကာ အဖွဲ့ချုပ် ဥက္ကဋ္ဌနှင့် တာဝန်ရှိသူများက ကြိုဆိုကြပြီး ပြည်ထောင်စုဝန်ကြီးက စခန်းဝင်လေ့ကျင့်နေသော ပဏာမလက်ရွေးစင်ဘိလိယက်နှင့်စနူကာအားကစားသမားများအား ရင်းရင်းနှီးနှီး လိုက်လံ နှုတ်ဆက်ပြီး လက်ရည်စမ်း ယှဉ်ပြိုင်ကစားနေမှုအား ကြည့်ရှုအားပေး၍ ပြိုင်ပွဲအပြီး၌ ဆုများ ချီးမြှင့်ခဲ့ပါသည်။

ဆက်လက်၍ ပြည်ထောင်စုဝန်ကြီးနှင့်အဖွဲ့သည် ညနေပိုင်းတွင် တာမွေမြို့နယ်၊ ကျိုက္ကဆံ ဘောလုံးကွင်း(၁)၌ (၃၃)ကြိမ်မြောက်အရှေ့တောင်အာရှအားကစားပြိုင်ပွဲသို့ ဝင်ရောက်ယှဉ်ပြိုင်ရန် အတွက် စခန်းဝင် လေ့ကျင့်နေသော တာတို/ တာလတ်အပြေး၊ မာရသွန်၊ လမ်းလျှောက်၊ လှံတံပစ်၊ သံပြားပစ်၊ သံလုံးပစ် ပဏာမလက်ရွေးစင်အားကစားသမားများ လေ့ကျင့်နေမှုအားကြည့်ရှုစစ်ဆေးပြီး မြန်မာနိုင်ငံပြေးခုန်ပစ်အဖွဲ့ချုပ်အတွင်းရေးမှူးမှ စခန်းသွင်းလေ့ကျင့်နေမှု၊ စံချိန်/စံနှုန်းရရှိမှု အခြေအနေများ၊ အောင်မြင်မှုရရှိနိုင်မည့် အခြေအနေများအား တင်ပြဆွေးနွေးရာ ပြည်ထောင်စု ဝန်ကြီးမှ လိုအပ်သည်များအား တာဝန်ရှိသူများကို လမ်းညွှန်မှာကြားခဲ့ပါသည်။

ထို့နောက် ပြည်ထောင်စုဝန်ကြီးနှင့်အဖွဲ့သည် နပန်းအားကစားလေ့ကျင့်ရေးရုံသို့ရောက်ရှိပြီး (၃၃)ကြိမ်မြောက်အရှေ့တောင်အာရှအားကစားပြိုင်ပွဲသို့ ဝင်ရောက်ယှဉ်ပြိုင်ရန်အတွက် စခန်းဝင်လေ့ကျင့်နေသော ပဏာမလက်ရွေးစင်နပန်း အားကစားသမားများ လေ့ကျင့်နေမှုအားကြည့်ရှုစစ်ဆေးကာ နိုင်ငံခြားနည်းပြငှားရမ်းလေ့ကျင့်နိုင်ရေး၊ ဒိုင်/နည်းပြသင်တန်းဖွင့်လှစ်နိုင်ရေးတို့အား လမ်းညွှန်မှာကြားခဲ့ကြောင်းသိရှိရသည်။