မြန်မာ့အနာဂတ်မျက်နှာစာ လူငယ်မဟာဗျူဟာဖိုရမ်-၂၀၂၅ (Future Front Myanmar : Youth Strategy Forum-2025) အောင်မြင်စွာ ကျင်းပနိုင်ရေးအတွက် ဒုတိယအကြိမ် လုပ်ငန်းညှိနှိုင်းအစည်းအဝေးကျင်းပ
နေပြည်တော်၊ ဩဂုတ် ၂၆
မြန်မာ့အနာဂတ်မျက်နှာစာ လူငယ်မဟာဗျူဟာဖိုရမ် -၂၀၂၅ (Future Front Myanmar : Youth Strategy Forum-2025) အောင်မြင်စွာ ကျင်းပနိုင်ရေးအတွက် ဒုတိယအကြိမ် လုပ်ငန်းညှိနှိုင်း အစည်းအဝေးကို ယနေ့မွန်းလွဲပိုင်းတွင် နေပြည်တော်၊ ရုံးအမှတ်(၃၁)ရှိ အားကစားနှင့်လူငယ်ရေးရာ ဝန်ကြီးဌာန စုပေါင်းအစည်းအဝေးခန်းမ၌ ကျင်းပခဲ့ရာ အားကစားနှင့်လူငယ်ရေးရာဝန်ကြီးဌာန ဒုတိယဝန်ကြီး ဦးဇင်မင်းထက်၊ လူငယ်ရေးရာဦးစီးဌာန ညွှန်ကြားရေးမှူးချုပ် ဦးကျော်စိုးမိုး၊ ဒုတိယ ညွှန်ကြားရေးမှူးချုပ်နှင့် တာဝန်ရှိသူများက Inperson စနစ်ဖြင့်လည်းကောင်း၊ နေပြည်တော်ကောင်စီ အဖွဲ့ဝင်နှင့် တိုင်းဒေသကြီးနှင့်ပြည်နယ် လူမှုရေးရာဝန်ကြီးများက Virtual စနစ်ဖြင့်လည်းကောင်း တက်ရောက်ခဲ့ကြသည်။
ဦးစွာ ဒုတိယဝန်ကြီး ဦးဇင်မင်းထက်က အဖွင့်အမှာစကားပြောကြားရာတွင် နိုင်ငံတကာရေးရာ၊ ပထဝီနိုင်ငံရေး၊ အမျိုးသားမဟာဗျူဟာနှင့်ပတ်သက်သည့် အခြေခံအသိပညာ ဗဟုသုတများရရှိစေရန် နှင့် လူငယ်များအကြား ခေါင်းဆောင်မှု၊ စူးစမ်းစဉ်းစားနိုင်မှုနှင့် ဆက်သွယ်ရေးကျွမ်းကျင်မှု အရည်အချင်း များ မြှင့်တင်ရန်အတွက် ရည်ရွယ်ပြီး မြန်မာ့အနာဂတ်မျက်နှာစာ လူငယ်မဟာဗျူဟာဖိုရမ်-၂၀၂၅ အခမ်းအနားအား ကျင်းပပြုလုပ်ပေးရခြင်းဖြစ်ကြောင်း၊ မြန်မာ့ယဉ်ကျေးမှုနှင့်အညီ တိုင်းဒေသကြီးနှင့် ပြည်နယ်ကိုယ်စားပြု တိုင်းရင်းသားဝတ်စုံများကို သပ်သပ်ရပ်ရပ် ဝတ်စားဆင်ယင်ပြီး ဖွင့်ပွဲ/ပိတ်ပွဲ အခမ်းအနားနှင့် ဆွေးနွေးပွဲအခမ်းအနားများသို့ တက်ရောက်ပါဝင်ဆွေးနွေးနိုင်ရေးအတွက် ပေါင်းစပ် ဆောင်ရွက်ပေးသွားရန် ပြောကြားခဲ့သည်။
ဆက်လက်ပြီး ရန်ကုန်တိုင်းဒေသကြီးအစိုးရအဖွဲ့ လူမှုရေးရာဝန်ကြီး ဦးဌေးအောင်က မြန်မာ့အနာဂတ် မျက်နှာစာ လူငယ်မဟာဗျူဟာဖိုရမ် -၂၀၂၅ ဖွင့်ပွဲ/ပိတ်ပွဲ အခမ်းအနားကျင်းပမည့် အစီအစဉ် များ၊ တည်းခိုနေထိုင်မည့်အစီအစဉ်များ၊ လေ့လာရေးသွားရောက်မည့် ခရီးစဉ်များနှင့် ပတ်သက်ပြီး အသေးစိတ်အား ရှင်းလင်းတင်ပြ ဆွေးနွေးခဲ့ပြီးနောက် တိုင်းဒေသကြီးနှင့် ပြည်နယ်များမှ အစိုးရအဖွဲ့ လူမှုရေးရာဝန်ကြီးများက အခမ်းအနား တက်ရောက်ရန်အတွက် ထူးချွန်လူငယ် ကိုယ်စားလှယ် ရွေးချယ်ထားရှိမှုများ၊ ကြိုတင်ပြင်ဆင်ဆောင်ရွက်ထားရှိမှု အစီအစဉ်များနှင့်ပတ်သက်ပြီး အသီးသီး တင်ပြဆွေးနွေးခဲ့ကြသည်။
ထို့နောက် ဒုတိယဝန်ကြီးက အခမ်းအနားသို့တက်ရောက်ရန်အတွက် ကြိုတင်ပြင်ဆင် ဆောင်ရွက်ထားရှိမှုများ၊ လေ့လာရေးခရီးစဉ်သွားရောက်မည့် အစီအစဉ်များနှင့် ပတ်သက်ပြီး လိုအပ် သည်များကို ဖြည့်စွက်ဆွေးနွေးပြောကြားခဲ့ပြီးနောက် နိဂုံးချုပ်ပြောကြားရာတွင် တစ်နိုင်ငံလုံးရှိ လူငယ်များအနေဖြင့် မြန်မာနိုင်ငံ ဖွံ့ဖြိုးတိုးတက်ရေးအတွက် အနာဂတ်လမ်းကြောင်းများ ရှုမြင်အဆိုပြု နိုင်စွမ်းကို မြှင့်တင်ဆောင်ရွက်ပေးနိုင်ရန်နှင့် အနာဂတ်တွင် အမျိုးသားအဆင့်နှင့် ဒေသဆိုင်ရာအဆင့် ဖွံ့ဖြိုးတိုးတက်ရေး လုပ်ငန်းအစီအစဉ်များအတွက် တက်ကြွသည့် လူငယ်ကွန်ရက်ကို ဖန်တီး ဖော်ဆောင်ပေးနိုင်ရန် ရည်ရွယ်၍ မြန်မာ့အနာဂတ် မျက်နှာစာ လူငယ်မဟာ ဗျူဟာဖိုရမ် -၂၀၂၅ အခမ်းအနားကို ကျင်းပပေးရခြင်းဖြစ်ကြောင်း၊ တိုင်းဒေသကြီးနှင့်ပြည်နယ်များမှ တာဝန်ရှိသူများနှင့် လူငယ်ကိုယ်စားလှယ်များအနေဖြင့် အခမ်းအနားကျင်းပသည့်ကာလအတွင်း လုံခြုံရေးသတိ၊ လုံခြုံရေး အသိဖြင့် တည်းခိုနေထိုင် သွားလာစားသောက်သွားကြရန်လိုကြောင်း၊ လူငယ်များ အသိပညာ ဗဟုသုတများစွာ ရရှိစေရန်အတွက် အထင်ကရနေရာများ၊ အမှတ်တရဖြစ်စေမည့်နေရာများ၊ လေ့လာရေး ခရီးစဉ်များနှင့် အခမ်းအနား အောင်မြင်စွာ ကျင်းပနိုင်ရေးအတွက် မိမိတို့ ဝန်ကြီးဌာနအနေဖြင့်လည်း လိုအပ်သည်များကို ပေါင်းစပ်ညှိနှိုင်း ဆောင်ရွက်ပေးသွားမည်ဖြစ်ကြောင်း ပြောကြားခဲ့ပြီး အစည်းအဝေးအား ရုပ်သိမ်းခဲ့သည်။
အဆိုပါအခမ်းအနားတွင် အိန္ဒိယနိုင်ငံမှ မဟာဗျူဟာ လေ့လာသုံးသပ်သူ Mr. Atul Aneja က ကမ္ဘာလုံးဆိုင်ရာ ပထဝီရှုခင်းရှုကွက်များကို နားလည်ခြင်း၊ ပြောင်းလဲနေသောကမ္ဘာနှင့် မြန်မာ-ပထဝီ နိုင်ငံရေး၊ မြန်မာ-ပထဝီ နိုင်ငံရေးနှင့် ဗဟုဝင်ရိုးကမ္ဘာ၊ ဆွစ်ဇာလန်နိုင်ငံ SUPDI မှ တွဲဖက်ပါမောက္ခ Mr.Lorenzo က မြန်မာနိုင်ငံနှင့် ပထဝီစီးပွားရေးမဟာဗျူဟာ၊ ပြောင်းလဲနေသော ကမ္ဘာနှင့် မြန်မာ-ပထဝီ စီးပွားရေး၊ မြန်မာ-ပထဝီ စီးပွားရေးနှင့် ဗဟုဝင်ရိုးကမ္ဘာ ခေါင်းစဉ်များဖြင့် ဟောပြောဆွေးနွေး ခြင်းများအားလည်းကောင်း၊ အနာဂတ်ပညာရေးနှင့် ကျွမ်းကျင်မှု၊ စီးပွားရေးအခွင့်အလမ်းများနှင့် လူငယ်စွန့်ဦးတီထွင်လုပ်ငန်းများ၊ နိုင်ငံသားပူးပေါင်းပါဝင်မှုနှင့် လူငယ်ခေါင်းဆောင်မှု၊ ရေရှည်တည်တံ့ မှုနှင့် ရာသီဥတုဆိုင်ရာ အရေးယူဆောင်ရွက်မှု၊ ကမ္ဘာလုံးဆိုင်ရာ ချိတ်ဆက်မှုနှင့် ယဉ်ကျေးမှုတိုးမြှင့် ခြင်းစသည့် မြန်မာ့အနာဂတ် မျက်နှာစာ လူငယ်မဟာဗျူဟာ-၂၀၂၅ (Myanmar Narrative Think Tank အဖွဲ့)ခေါင်းစဉ်အား အဖွဲ့လိုက်အလုပ်ရုံ ဆွေးနွေးခြင်းများအားလည်းကောင်း၊ ကမ္ဘာ့ကဖေးပုံစံ ဆွေးနွေးခြင်းများ၊ Icebreaker Activity / Energizer Quiz ပုံစံ ဆွေးနွေးခြင်းများနှင့် အနှစ်ချုပ် ဆွေးနွေးခြင်းများအားလည်းကောင်း ဆောင်ရွက်သွားမည်ဖြစ်ကြောင်း သိရသည်။
