ပြည်ထောင်စုဝန်ကြီး ဦးမင်းသိန်းဇံ (၁၉)ကြိမ်မြောက် အာရှအားကစားပြိုင်ပွဲ ဝူရှူးပြိုင်ပွဲအား သွားရောက်ကြည့်ရှုအားပေး
ဟန်ကျိုး၊ စက်တင်ဘာ(၂၇)။
တရုတ်ပြည်သူ့သမ္မတနိုင်ငံက အိမ်ရှင်အဖြစ်လက်ခံကျင်းပသည့် (၁၉)ကြိမ်မြောက် အာရှအားကစားပြိုင်ပွဲများကို မြို့အသီးသီးရှိ အားကစားကွင်း/အားကစားရုံများ၌ ကျင်းပလျက်ရှိရာ မြန်မာနိုင်ငံအိုလံပစ်ကော်မတီဥက္ကဋ္ဌ၊ အားကစားနှင့်လူငယ်ရေးရာဝန်ကြီးဌာန ပြည်ထောင်စုဝန်ကြီး ဦးမင်းသိန်းဇံ၊ မြန်မာနိုင်ငံဝူးရှူးအဖွဲ့ချုပ်ဥက္ကဋ္ဌ ဦးသစ္စာ၊ ဒုတိယဥက္ကဋ္ဌ ဦးအောင်နိုင်နှင့် အုပ်ချုပ်မှုအဖွဲ့တာဝန်ရှိသူများသည် ယနေ့နံနက် ဒေသစံတော်ချိန် (၁၀)နာရီအချိန်က ဟန်ကျိုးမြို့ရှိ Xiaoshan Guali Sports Center အားကစားရုံ၌ ကျင်းပလျက်ရှိသည့် ဝူရှူးအားကစားနည်းပြိုင်ပွဲ၌ မြန်မာနိုင်ငံမှ စန္ဒီဦးက ကျန့်စု(ခေါ်) နှစ်ဖက်သွားဓါးနှင့် ချန်းစု(ခေါ်) လှံရှည်ပြိုင်ပွဲတို့တွင် ဝင်ရောက်ယှဉ်ပြိုင်ကစားနေမှုကို သွားရောက်ကြည့်ရှုအားပေးခဲ့သည်။
(၁၉)ကြိမ်မြောက် အာရှအားကစားပြိုင်ပွဲ ဝူရှူးအားကစားနည်းတွင် မြန်မာနိုင်ငံမှ ပြိုင်ပွဲဝင်(၄)ဦး ဝင်ရောက်ယှဉ်ပြိုင်ရာ နိုင်ငံအလိုက် မြတ်နိုးအိမ်က အဆင့်(၁၁)၊ စွမ်းရည်ထက်နိုင်က အဆင့်(၁၇)၊ အေးသစ္စာမြင့်က အဆင့်(၆)နှင့် စန္ဒီဦးတို့က အဆင့်(၉)ဖြင့် အသီးသီး ရရှိခဲ့ကြသည်။
(၂၈.၉.၂၀၂၃)ရက်နေ့ ဒေသစံတော်ချိန် နေ့လယ်(၂)နာရီတွင် မြန်မာနိုင်ငံမှ E-Sports အားကစားနည်းတွင် ဝင်ရောက်ယှဉ်ပြိုင်ကစားမည်ဖြစ်ပြီး၊ ဒေသစံတော်ချိန် ညနေ(၇)နာရီခွဲ အချိန်တွင် ဘောလုံး(အမျိုးသား) (၁၆)သင်းအဆင့် ရှုံးထွက်ပွဲစဉ်အဖြစ် မြန်မာ(U-24)အသင်းနှင့် ဂျပန်(U-24) အသင်း၊ ဒေသစံတော်ချိန် ညနေ(၇)နာရီခွဲအချိန်တွင် ဘောလုံး (အမျိုးသမီး) အုပ်စုနောက်ဆုံးပွဲစဉ်အဖြစ် မြန်မာ့လက်ရွေးစင်အသင်းနှင့် ဖိလစ်ပိုင်အသင်းတို့ ယှဉ်ပြိုင်ကစားကြမည်ဖြစ်ကြောင်း သိရှိရသည်။
