အားကစားနှင့်လူငယ်ရေးရာဝန်ကြီးဌာန

မြန်မာ့အားကစားသမိုင်း

(က) BURMA ATHLETIC ASSOCIATION –  (B.A.A) ကာလ
 
(၂၀)ရာစုအဝင်မှ ၁၉၄၁ ခုနှစ်အထိ ရန်ကုန်မြို့တွင် (BURMA ATHLETIC ASSOCIATION) နှင့် မန္တလေးမြို့တွင် (UPPER BURMA ATHLETIC ASSOCIATION) တို့က အားကစားလုပ်ငန်းများဆောင်ရွက်ခဲ့သည်။ ၁၉၃၆ ခုနှစ်၊ ဂျာမဏီနိုင်ငံ၊ ဘာလင်မြို့တွင်ကျင်းပသည့် (၁၁)ကြိမ်မြောက် အိုလံပစ်ပြိုင်ပွဲတွင် အလေးမ အားကစားသမား ဦးဇော်ဝိတ်နှင့် နည်းပြ ဦးရှိန်တို့ ပါဝင်ယှဉ်ပြိုင်ခဲ့သည်။
 
(ခ) အမျိုးသားကိုယ်လက်ကြံ့ခိုင်ရေးကောင်စီ (NATIONAL FITNESS COUNCIL) မပေါ်မီကာလ (သို့) (BURMA OLYMPIC ASSOCIATION)
 
(၂၆.၁၁.၁၉၄၆) ရက်နေ့တွင် စတင်ပြီး နာယကအဖြစ် ဗိုလ်ချုပ်အောင်ဆန်းနှင့် ဘုရင်ခံ (SIR HUBERT RANCE)၊ ဥက္ကဌ အဖြစ် ဆာဂျေအေမောင်ကြီး၊ ဒုတိယဥက္ကဌအဖြစ် ဦးရာဇတ်တို့ ဆောင်ရွက်ခဲ့သည်။ (၉.၇.၁၉၄၇)ရက်နေ့တွင် အပြည်ပြည်ဆိုင်ရာအိုလံပစ်ကော်မတီနှင့် တရားဝင် ဆက်သွယ်ခဲ့ပြီး ၁၉၄၈ ခုနှစ် ၊ (၁၄)ကြိမ်မြောက် လန်ဒန်အိုလံပစ်ပြိုင်ပွဲ တွင် မြန်မာနိုင်ငံအဖြစ် စတင် ပါဝင်ယှဉ်ပြိုင်ခွင့်ရရှိသည်။
 
(ဂ) အမျိုးသားကိုယ်လက်ကြံ့ခိုင်ရေးကောင်စီ (NATIONAL FITNESS COUNCIL)
 
(၉.၁၀.၁၉၅၀)ရက်နေ့တွင် ဥပဒေနှင့်အညီ(NFC)ဖွဲ့စည်းခဲ့ပြီး၊ ဥက္ကဌအဖြစ် ကျန်းမာရေးဝန်ကြီး တာဝန်ယူ၍ အဖွဲ့ဝင်(၁၅)ဦး ပါဝင်သည်။ ရည်ရွယ်ချက်မှာ “တစ်မျိုးသားလုံး၏ ကျန်းမာရေးနှင့် လူငယ်တို့၏ကိုယ်လက်ကြံ့ခိုင်ရေး” ကို အထူးဂရုပြုဆောင်ရွက်ရန်ဖြစ်ပါသည်။ တစ်နိုင်ငံလုံးတွင် (DISTRICT COUNCIL) များ ဖွဲ့စည်း၍ ခရိုင်စည်းရုံးရေးမှူးများ ခန့်အပ်တာဝန်ပေးပြီး၊ အားကစားလုပ်ငန်းများဆောင်ရွက်ခဲ့သည်။ ၁၉၅၂ ခုနှစ် မှစတင်၍ပြည်နယ်နှင့် တိုင်းဘောလုံး ပြိုင်ပွဲကိုကျင်းပခဲ့သည်။ အပြည်ပြည်ဆိုင်ရာပြိုင်ပွဲများအနေဖြင့် ၁၉၅၇ ခုနှစ် အရှေ့တောင်အာရှ လက်ဝှေ့ပြိုင်ပွဲနှင့် ၁၉၆၁ခုနှစ် ဒုတိယအကြိမ် အရှေ့တောင် အာရှကျွန်းဆွယ် အားကစားပြိုင်ပွဲ တို့ကို လက်ခံကျင်းပပေးနိုင်ခဲ့သည်။
 
(ဃ) မြန်မာနိုင်ငံ အားကစားနှင့် ကာယပညာကော်မတီ
 
(၂၇.၅.၁၉၆၄)ရက်နေ့တွင် စတင်ဖွဲ့စည်းသည်။ ဥက္ကဌအဖြစ် ကျန်းမာရေးဝန်ကြီးဌာနဝန်ကြီးနှင့် အတွင်းရေးမှူး အဖြစ် အားကစားနှင့် ကာယပညာကော်မတီရုံး ညွှန်ကြားရေးမှူးချုပ်တို့ တာဝန်ယူ ဆောင်ရွက်ပြီး တစ်နိုင်ငံလုံးတွင် တိုင်း၊ ခရိုင်နှင့် မြို့နယ်ကော်မတီများဖွဲ့စည်း၍ အားကစားမှူးများ ခန့်အပ် တာဝန်ပေးဆောင်ရွက်ခဲ့သည်။
 
(င) အားကစားနှင့် ကာယပညာဦးစီးဌာန ဖွဲ့စည်းဆောင်ရွက်ခြင်း
၁၉၇၂ခုနှစ်တွင် ကျန်းမာရေးဝန်ကြီးဌာနလက်အောက်၌ အားကစားနှင့်ကာယပညာဦးစီးဌာနကို ဖွဲ့စည်းတာဝန်ပေးသည်။ (၁.၇.၁၉၉၃)ရက်နေ့မှစ၍ ကျန်းမာရေး ဝန်ကြီးဌာနလက်အောက်မှ ဝန်ကြီးချုပ်ရုံးဝန်ကြီးလက်အောက်သို့ ပြောင်းလဲဖွဲ့စည်းတာဝန်ပေးခဲ့သည်။
 
(စ) အားကစားဝန်ကြီးဌာနဖွဲ့စည်းတာဝန်ပေးအပ်ခြင်း
 
နိုင်ငံတော်ငြိမ်ဝပ်ပိပြားမှုတည်ဆောက်ရေးအဖွဲ့၏ (၁၈.၁၂.၉၆)ရက်စွဲပါ အမိန့်ကြော်ငြာစာအမှတ် (၄၀/၉၆)ဖြင့် အားကစားဝန်ကြီးဌာနအဖြစ် တိုးချဲ့ ဖွဲ့စည်းပေးခဲ့ပြီး၊ အားကစားနှင့်ကာယပညာဦးစီးဌာနကို ဝန်ကြီးချုပ်ရုံးအောက်မှ အားကစားဝန်ကြီးဌာနသို့ လွှဲပြောင်းလက်ခံ ဆက်လက် ဆောင်ရွက်ခဲ့သည်။