ဒုတိယဝန်ကြီး ဦးထိန်လင်း (၃၃)ကြိမ်မြောက်အရှေ့တောင်အာရှအားကစားပြိုင်ပွဲသို့ ဝင်ရောက်ယှဉ်ပြိုင်အောင်မြင်မှုများ ရရှိစေရေးအတွက် သက်ဆိုင်ရာအားကစားအဖွဲ့ချုပ်အသီးသီးနှင့် တွေ့ဆုံအစည်းအဝေးကျင်းပ
ရန်ကုန်၊ ဧပြီလ (၆)ရက်
(၃၃)ကြိမ်မြောက်အရှေ့တောင်အာရှအားကစားပြိုင်ပွဲသို့ ဝင်ရောက် ယှဉ်ပြိုင်အောင်မြင်မှုများ ရရှိစေရေးအတွက် သက်ဆိုင်ရာအားကစားအဖွဲ့ချုပ်အသီးသီးနှင့် တွေ့ဆုံသည့် အစည်းအဝေး ကို ယနေ့နေ့လယ် (၁၃:၀၀)နာရီမှ (၁၇:၃၀) နာရီအချိန်အထိ အမျိုးသားအားကစားပြိုင်ပွဲရုံ(၁) သုဝဏ္ဏရှိ ပတ္တမြားခန်းမ၌ ကျင်းပပြုလုပ်ရာ အားကစားနှင့်လူငယ်ရေးရာဝန်ကြီးဌာန ဒုတိယဝန်ကြီး ဦးထိန်လင်း ၊ အားကစားနှင့်ကာယပညာဦးစီးဌာန ညွှန်ကြားရေးမှူးချုပ် နှင့် အားကစားနှင့်ကာယပညာဦးစီးဌာနမှ တာဝန်ရှိပုဂ္ဂိုလ်များ၊ သက်ဆိုင်ရာမြန်မာနိုင်ငံအားကစား အဖွဲ့ချုပ်အသီးသီးမှ ဥက္ကဌများ၊ ဒုတိယဥက္ကဋ္ဌများ၊ အတွင်းရေးမှူးများနှင့် မြန်မာ့လက်ရွေးစင် ပြေးခုန်ပစ်အားကစားသမားဟောင်းကြီးများ တက်ရောက်ကြပါသည်။
အစီအစဉ်အရ အစည်းအဝေးပထမပိုင်းအဖြစ် ဘတ်စကက်ဘော၊ ပြေးခုန်ပစ်၊ ဝူရှူး၊ ဘော်လီဘော၊ ခြင်းလုံး၊ ပန်ကြပ်စီလပ်၊ ပိုက်ကျော်ခြင်း၊ ဘိလိယက် နှင့်စနူကာအဖွဲ့ချုပ်များ၊ အစည်းအဝေးဒုတိယပိုင်းအဖြစ် ညနေပိုင်းတွင် စားပွဲတင်တင်းနစ်၊ ဘိုးလင်း၊ Squash ၊ နပန်း၊ ကစ်ဘောက်ဆင်၊ ကဘတီ (Kabaddi) အဖွဲ့ချုပ်များနှင့် တွေ့ဆုံဆွေးနွေးခဲ့ပါသည်။
ဦးစွာ အားကစားနှင့်လူငယ်ရေးရာဝန်ကြီးဌာန ဒုတိယဝန်ကြီး ဦးထိန်လင်း က အဖွင့်အမှာစကားပြောကြားရာတွင် ၂၀၂၅ခုနှစ်၊ ဒီဇင်ဘာလအတွင်း ထိုင်းနိုင်ငံ တွင်ကျင်းပပြုလုပ်မည့် (၃၃)ကြိမ်မြောက် အရှေ့တောင်အာရှအားကစားပြိုင်ပွဲသို့ မြန်မာနိုင်ငံမှ ဝင်ရောက် ယှဉ်ပြိုင် နိုင်ရေးအတွက် နေပြည်တော်တွင် အားကစားနည်း(၁၂)နည်း ၊ ရန်ကုန်တွင် အားကစားနည်း (၅)နည်း စခန်းသွင်း လေ့ကျင့်လျက်ရှိကြောင်း၊၂၈.၃.၂၀၂၅ ရက်နေ့တွင် ဖြစ်ပေါ်ခဲ့သည့် သဘာဝဘေးအန္တရာယ် မြေငလျင်လှုပ်ခတ်မှုကြောင့် စခန်းဝင်အားကစားသမားများ လေ့ကျင့်မှုမပြတ်တောက်စေရေးအတွက် နေပြည်တော် တွင် စခန်းသွင်းလေ့ကျင့်လျက်ရှိသည့် အားကစားနည်းများမှ အားကစားနည်း(၈)နည်းကို ရန်ကုန်သို့ ပြောင်းရွှေ့စခန်းသွင်းလေ့ကျင့်ရန် စီစဉ်ထားပါကြောင်း၊ရန်ကုန်တွင် စခန်းသွင်းလေ့ကျင့်မည့် အားကစားနည်းများအတွက် တည်းခိုနေထိုင် စားသောက်ရေးကို အား/ကာသိပ္ပံ(ရန်ကုန်)တွင်လည်းကောင်း၊ လေ့ကျင့်မှုများကို သက်ဆိုင်ရာအားကစားကွင်း/အားကစားရုံများတွင်လည်းကောင်းစီစဉ်ဆောင်ရွက်ပေးမည်ဖြစ်ပါကြောင်း၊ပြောင်းရွှေ့လေ့ကျင့်နိုင်ရေးနှင့်ပတ်သက်၍ သင်္ကြန်ကာလမတိုင်မီ (သို့မဟုတ်) ဧပြီလကုန် နောက်ဆုံးထား၍ ပြောင်းရွှေ့နိုင်ရေးအတွက် ယခုအစည်းအဝေးကို ခေါ်ယူရခြင်းဖြစ်ပါကြောင်း၊ အဖွဲ့ချုပ်များအနေဖြင့် မိမိတို့ အားကစားနည်းနှင့် ပတ်သက်၍ မည်ကဲ့သို့တာဝန်ယူဆောင်ရွက်ပေးမည်ကိုဆွေးနွေးစေလိုပါကြောင်း၊ ပြေးခုန်ပစ်လက်ရွေးစင်အားကစားသမားဟောင်းကြီးများအနေဖြင့်လည်း အားကစားသမား များကို အချိန်ပိုင်း(သို့မဟုတ်) အလှည့်ကျစနစ်ဖြင့် ကြီးကြပ်ကွပ်ကဲနိုင်ရေးအတွက် မည်ကဲ့သို့ ဆောင်ရွက်မည်ကို ဆွေးနွေးစေလိုပါကြောင်း၊(၃၃)ကြိမ်မြောက်အရှေ့တောင်အာရှအားကစားပြိုင်ပွဲကျင်းပရန် ရက်ပေါင်း (၂၄၇)ရက်ခန့် သာ လိုတော့သည့်အတွက် အဖွဲ့ချုပ်ဥက္ကဌများအနေဖြင့် မိမိအားကစားနည်းဆုတံဆိပ်များရရှိနိုင်ရေး၊ မိမိအားကစားနည်းအလိုက်ပြိုင်ပွဲများဝင်ရောက်ယှဉ်ပြိုင်ရာတွင် ရွှေ၊ ငွေ၊ ကြေး ဆုတံဆိပ်များ ရရှိစေရေးအတွက် အစဉ်တစိုက် အနီးကပ် ကြပ်မတ်ကွပ်ကဲဆောင်ရွက်ပေးနိုင်ပါရန်နှင့်ထောက်ပံ့အားပေးမှုများကိုဆောင်ရွက်ပေးစေလိုပါကြောင်း၊ ပြောကြားခဲ့ပါသည်။
ဆက်လက်၍ အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးထွန်းမြင့်ဦး မှ ဆွေးနွေးပြောကြားရာတွင် ဒီဇင်ဘာလ(၉)ရက်နေ့မှ (၂၀)ရက်နေ့အထိ ထိုင်းနိုင်ငံ၊ ဘန်ကောက် ချောင်ဘူရီ နှင့် ဆွန်ဖရာ တို့တွင်ကျင်းပပြုလုပ်မည့် (၃၃)ကြိမ်မြောက်အရှေ့တောင်အာရှအားကစားပြိုင်ပွဲတွင် အောင်မြင်မှုရရှိရေးအတွက်ကြိုတင်ပြင်ဆင်ဆောင်ရွက် နိုင်ရေး အားကစားနည်း(၈)နည်း ရန်ကုန်သို့ ပြောင်းရွှေ့လေ့ကျင့်ရာတွင် နေထိုင်ရေး၊ စားသောက်ရေး၊ လေ့ကျင့်ရေး ကိစ္စရပ်များအဆင်ပြေစေရန် အသေးစိတ်စီမံဆောင်ရွက်ထားကြောင်း၊ ပြည်နယ် နှင့်တိုင်းဒေသကြီးပြိုင်ပွဲများကိုလည်း ရန်ကုန်၌ (၁၅)မျိုးကျင်းပသွားရန်ရှိကြောင်း၊ လေ့ကျင့်ရေး အထောက်အကူပြုပစ္စည်းများ၊ပြိုင်ပွဲဝင်ပစ္စည်းများနှင့်အားကစားသမားများရန်ကုန်သို့ပြောင်းရွှေ့နိုင်ရေးကိစ္စရပ်များ၊ ရေ၊မီးလုံလောက်စွာရရှိရေးကိစ္စရပ်များဆောင်ရွက်ပေးထားပါကြောင်း၊ အဖွဲ့ချုပ်များမှ မိမိတို့ အားကစားနည်းအလိုက် ဝိုင်းဝန်းကွပ်ကဲပူးပေါင်းဖြည့်ဆည်း ဆောင်ရွက်ပေးစေလိုကြောင်း၊ မျိုးဆက်သစ်အားကစားသမားများပေါ်ထွက်လာစေရေးကိစ္စရပ်များ၊ SEA GAMES ပြိုင်ပွဲသို့သွားရောက်ယှဥ်ပြိုင်ရာတွင်လိုအပ်ချက်များရှိပါက အားကစားအဖွဲ့ချုပ်များမှလည်းဝိုင်းဝန်းကူညီဆောင်ရွက်ပေးစေလိုပါကြောင်း၊(၃၃)ကြိမ်မြောက် အရှေ့တောင်အာရှအားကစားပြိုင်ပွဲ၌ဆုတံဆိပ်များရရှိပြီးနိုင်ငံအလိုက်အဆင့်တွင်မိမိနိုင်ငံအနေဖြင့် အဆင့်မနိမ့်ကျအောင်အထူးကြိုးပမ်းဆောင်ရွက်စေလိုပါကြောင်းပြောကြားခဲ့ပါသည်။
ယင်းနောက်အစည်းအဝေးတက်ရောက်လာသောမြန်မာနိုင်ငံအားကစားအဖွဲ့ချုပ်များမှ ဥက္ကဌများ၊ဒုဥက္ကဌများ၊အတွင်းရေးမှူးများက(၃၃)ကြိမ်မြောက်အရှေ့တောင်အာရှအားကစားပြိုင်ပွဲဝင်ရောက်ယှဥ်ပြိုင်နိုင်ရေးအတွက်ရန်ကုန်မြို့၌ဆက်လက်စခန်းသွင်းဆောင်ရွက်မည့်ကိစ္စရပ်များ၊ မိမိတို့အဖွဲ့ချုပ်အလိုက်အားကစားသမားများဆက်လက်စခန်းသွင်းလေ့ကျင့်မည့်အခြေနေများ၊ အားကစားလေ့ကျင့်ရေးအထောက်ကူပြုပစ္စည်းများ၊ပြိုင်ပွဲဝင်အားကစားပစ္စည်းများသယ်ယူထားရှိရေးကိစ္စရပ်များလေ့ကျင့်ရေးကွင်းများအဆင်ပြေကောင်းမွန်စေရေးကိစ္စရပ်များ၊ နည်းပြများရရှိရေး နှင့်နိုင်ငံခြားပြိုင်ပွဲများသို့သွားရောက်ယှဥ်ပြိုင်မည့်ကိစ္စရပ်များ၊၊ရွှေ၊ငွေ၊ကြေးဆုတံဆိပ်များရရှိစေရေးအတွက်ကြိုးစားဆောင်ရွက်နေသည့်ကိစ္စရပ်များ၊အင်အားဖြည့်စားသောက်ရေးကိစ္စရပ်များ၊အနီးကပ်ကြပ်မတ်ကွပ်ကဲဆောင်ရွက်ပေးနိုင်မှုနှင့်လိုအပ်သည့်ကိစ္စရပ်များ၌အားလုံးဝိုင်းဝန်းပူးပေါင်းဆောင်ရွက်ပေးသွားမည်ဖြစ်ကြောင်းပြောကြားခဲ့ပါသည်။
ထို့နောက်ဒုတိယဝန်ကြီး၊ ညွှန်ကြားရေးမှူးချုပ် နှင့် တာဝန်ရှိသူများက (၃၃)ကြိမ်မြောက်အရှေ့တောင်အာရှအားကစားပြိုင်ပွဲအောင်မြင်မှုများရရှိစေရေးနှင့်ပတ်သက်သည့်ကိစ္စရပ်များနှင့်ဆောင်ရွက်ပေးမည့်ကိစ္စရပ်များအပေါ်လိုအပ်ချက်များအားအသေးစိတ်ဖြည့်စွက်ဆွေးနွေးပြောကြားခဲ့ကြောင်းသိရှိရပါသည်။
